«In’è una sposa desiderebbe ciò ch’omu trova sempre in’è e done di stradacce a marca di u desideriu sudisfatu.»

Scrivu felice di l’uccasione chi m’ha permessu di saziammi. Di novu, imagineghju accessu è vita pussibule. Senza rassegnammi.

In’è una serenità acuta, davanti à u celu stellatu è neru, davanti à a culletta è à l’arburi neri, aghju ritrovu ciò chi face di u mò core una brustasgia cuverta di cendara, ma ardente in ‘entru : u sentimentu di una presenza irreduttibule à qualessa nuzione, ‘sta spezia di silenziu di fulmine qu’inizià l’estasi. Diventu sfughje immensa fora di me, cume se a mò vita si sculessi in fiumi losci à traversu l’inchjostru di u celu. Un sò più allora propriu eiu, ma ciò che esciutu da me tocca è chjode in’é a sò strinta una presenza senza cunfini, ella stessa simule à a perdita di a mò propria persona : qualessa un hè piu ne eiu ne altra, ma un basgiu prufunde, in’è quale si perderebbenu i cunfini di e labbre, si lia à ‘st estasi, cusi bughjosu, cusi pocu straniu à l’Universu cume u corsu di a Terra à traversu a perdita di u celu.

A ‘stu mumentu pò principià u Sacrifiziu. A ‘stu mumentu riprincipià l’Insudisfazione, a Zerga è a Fierezza. In’é u silenziu, un acellu neru à l’ale scomode, carcu di odiu finu à per sè, avidu di toglie ciò chi si chjama sempre Tenerezza, Amore : l’estasi ha cessatu d’esse tullerevule è sola rimane une virilità viota………………………………………………………………….. Mi ritrovu sulitariu : à a fine, l’ortu si stende davanti à me custruitu in prufundezza, cume l’architettura d’un vastu munumentu funerariu, apertu sottu à i mò pedi ; cusi bughjosu, cusi prufunde, chi pare un abissu.

A mò descrizzione hè incerta è magaru inintelligibule. Imagineghju un omu à l’articulu di a morte, vulendu dà qualchi segnu, un’ultima volta, testimunià di a sò vita. U segnu indetta che si passa una cosa, ma che cosa ? Eppuru, a credu, puderebbe esse seguitatu, pruvà à mò fedeltà (più sana in’é a prima parte che ‘n’é a seconda).

In’é un cau à tumbà i boi. U mò capu sodu di campagnolu resiste. I colpi  di mazza di l’alcolu un marcanu più indè mè che un «desideriu insudisfattu». Hè difficiule d’intravede, in’é u disordine di ‘ste pagine, l’incuerenza mediocre di una vita. Se una virtù sussiste dentr’à mè, l’esauriscu à vene à capu di a vulgarità di e circunstanze, à diventà inchjappevule, à liberammi senza una parolla di ciò chi mi pare d’inchjuvammi.

Passu vulinteri – s’ellu ci vole da una svultata – davanti à a ghjesa di a Maddalena : intravecu l’Ubeliscu tra e culunnate di i palazzi Gabriel, di sopra à u palazzu Bourbon, appaghjendu u so acu à a coppula indurata di l’Invalides. L’apparatu scenicu raprisente in quant ‘à mè tutta a tragedia ch’un poppulu ci ghjucò. A munarchia, chjave di ‘st’ordine munumentale, abbattuta in’é u sangue – sottu  i clamori di a folla cattiva – poi rinascendu, in’è un silenziu di petra, discreta, impenetrabule à u desinteressu di i passanti. U possu pensa senza alacrità à l'”anima di u mondu” sepolta, glurificata in’è l’archittettura di l’Invalides. Scappu senza pena à u surtilegiu chi annuda i spiriti i più faciuli, ma a grandezza di l’edifiziu hegelianu, doppiamente abbattutu, trova indè mè luntani ribombi. Glorie, sciagure, silenzi cumponenu un inchjappevule misteru, da u fondu di quale l’Ubeliscu hè sortu.

Sò passatu duie volte dapò a guerra a u pede di u monolitu, ch’un aghju mai vistu ‘n’é ‘stu bughju. Per mancanza di avellu avvicinatu ‘n’é a notte attuale, l’estrema maestà ne scappa. Da u fondamentu, intravidia u bloccu di granitu persu in’è a profundità di u celu : frastagliava i sò spiculi direttamente ‘n’è u scintillime di e stelle. In’è a notte a petra aizata avia a maestà di e muntagne : ghjera cume a morte è e rene, silenziosa, bella cume u bughju è fessa cume un rullu di tamburu.

Voghju discrive una sperienza mistica è un mi ne scartu che in apparenza, ma quale distinguerebbe una strada ‘n’è u cau ch’intruduciu ?

U corpu nudu, esibitu, pò esse vistu cu indifferenza. Listessa ghjè faciule di fideghjà u celu sopra à sè cume un viotu. U corpu esibitu, ettantu, ha à i mò ochji u listessa putere che ‘n’é u ghjocu sessuale, è possu apre ‘n’é a tesa chjara ò bughjosa di u celu a ferita à quale aderiscu cume à a nudità feminile. L’estasi cerebrale pruvata da un omu basgiendu una donna ha cume scopu a freschezza di a nudità ; ‘N’è u spaziu viotu, ‘n’è a profundità aperta di l’universu, u straniu di a mò meditazione tocca un scopu chi mi libera.

Aghju discrittu ciò ch’ò pruvava ‘sta sera, meditendu davanti à un nullu neru di quale a dislucazione mi paria «acrubatica» – storta di membri aggavugliati.

Un cunfondu micca e mò dissolutezza è à mò vita mistica. A discrizzione di u tantrismu ‘n’è u lavoru d’Eliade ha lasciatu indè mè un sentimentu d’aversione. Mi tengu da una parte à l’altra à impeti senza mischiu. Prove di cumprumessi, d’altrò alluntanate di i langori di u tantrismu, un hannu fattu che d’alluntanammi di e pussibulità di ‘stu generu. E riferisceraghju – più luntanu – vulendu testimunià di u statu salvaticu à quale si lia a mò sperienza.

Piacè di mughjà, sprufundatu da a prufundezza fessa, fulminante : un importa più di sapè ciò chi ghjè in fondu à l’abissu. Scrivu sempre brusgiatu, un andaraghju micca più luntanu. Un puderebbe dine di più. Un possu discrive l’incendiu di u celu, ciò chi ghjè quì, subitu, d’acutu, di dolce, di simplice, d’intullerevule, cume la ghjè l’agunia di un zitellu. Aghju paura scrivendu ‘st’ultime parolle, paura di u silenziu viotu ch’eiu sò, davanti… Ci vole di a fermezza per indurà una luce cusì viva è un risente nisuna vanità di l’intelligenza, di a fermezza per un indebulisce quandu una sola verità diventa chjara : chi a voglia d’inchjuvà ciò chi ghjè quì ‘n’è una categuria intellettuale, ghjè riducesi à una mancanza d’ilarità fiera chi ha per effettu a fede in Diu. Rimane virile ‘n’é a luce dumanda l’arditezza di un ignuranza pazza : lasciassi avvampà, gridendu di gioià, aspettà a morte – in cagione di una presenza scunnisciuta, incunnuscevule ; diventà sè stessu amore è luce ceca, tuccà una perfetta inintelligenza di sole.

Impussibule d’accede à ‘st’inintelligenza virile prima d’avè penetratu u sicretu di a nudità. Duvemu in primu locu trasgredisce interdetti di quale u rispettu chjosu si lia à a trascendenza divina, à l’umiliazione infinita di l’omu.

Mai u vastu rilettu umanu un cessa di derivà u longu fiume sordu à u rimore di i nostri discorsi : subitu, entre ‘n’è un rimore di cataratta…

A dura è luminosa nudità di e cule, innighevule verità di l’elpali à i cavi di u mare è di u celu. U tempu tra e duie guerre ghjè quellu induve e bugie un eranu di menu necessarie à a vita che l’alcolu. A mancanza di soluzione un hè micca esprimevule.

Traditu da G.C. l’8 d’Aprile 2012