Quandu a notte di u 31 di lugliu, i mazzeri stanu ricapizzati à e bocche chi limiteghjanu i paesi, pè, erbughju i manu, lampassi in’è a più terribula battaglia di l’annu, un si sente che silenziu. Eppuru omu sà chi l’esciuta di ‘stu cumbattimentu fissà u numeru de i morti d’ogni paese pè l’annu chi corre. Omu corsu si ! Ma chi omi sò quelli chi hanu à more ? I maghi cacciadori chi sò i mazzeri, partenu in sognu à frattighjà animali salvatichi. Se mai ne tombanu unu, à u puntu di more, u visu di quellu animale fa vede u visu di l’omu ch’ellu ghjè in’è u mondu reale. In generale, l’omu more ‘n’è i ghjorni chi seguitanu a tumbera.

A sorte di l’omi è di l’animali pare intrecciata ‘n’é una doppia currispundenza : quand’elli sò cume duie faccette di una listessa forza universale, tra l’altru mondu è a realtà, quandu a carne è u sangue di l’uni servenu di nutrimenti à l’altri. Cusì, ogni volta chi l’omu tomba un animale, da à a morte una cria di a sò vita, allorche a carne di a sò preda u rinforza. Listessa accade se un animale tomba un omu.

Plautu dicia à u terzu seculu avant’à Diu che “l’omu hè un lupu pè l’omu“. A quale Erasmu piu tardi ricuccò : “l’omu pè l’omu, o Diu o lupu”. Ancu se l’omu ammansò u lupu 12 000 anni fà è ne fece u cane, un ci vene mai di paraguna u cane à l’omu. Infatti, ghjè u mondu salvaticu chi ci dà u capugiru, ‘stu mondu chi a listessu tempu ci dede a vita è a morte. L’estru di l’omu intreccia ‘sti dui poli di a sorte umana ‘n’è un impastu spirituale è materiale inspezzevule. Ma spuntanu d’altri poli, cume quellu di a raziunalità è di u bè versu di l’omu contra quellu di u male versu à l’animali. A selva oscura, salvatica è aspre chi circonda l’infernu di Dante un hè micca puppulata d’animali salvatichi ?

‘St’impastu animale è umanu ghjè à l’urigine di tutte l’emuzioni di l’omi. Fu stazzunatu ‘n’è una longa storia di spaventu quandu omi eranu prede, da dui millioni d’anni à 600 milla prima ch’elli imparghessinu à ammaestrà u focu. Dopu fu quella di paura è di curagiu quand’elli sò stati cacciadori racuglidori. In fine fu quella di a crudeltà di l’omu pè l’omu. Quand’ellu s’avvampa in’è u spiritu di certi, eccu l’hybris chi festighja u diu Pan mezu umanu, mezu caprone, oppuru una guerra senze mercè.

Cusì, l’emuzioni di l’omi chi supraneghjanu a sò raziunalità serebbenu l’espressione di a parte animale di a sò materia. Sapemu oghe chi ‘sta parte misteriosa cuntene à listessu tempu a capacità di cria, di sugnà, d’inventà chi ghjè à l’urigine di e più belle cose chi venenu da l’omu, è e capacità e più terribule. Tutti i poli sò ancu puru mischiati quandu a pela di l’omu ghjè nantu quella di una donna, tramindui si trovanu ‘ncu u corpu, u core è l’anima infiarati. A u mumentu di l’estasi, di a sudisfazione chi puderebbe esse cumpleta, toccanu à un statu induve hanu abandunatu tutta raziunalità, tutti l’attributi umani, a tal puntu che li parenu di more.

Quandu Ghjorghju Battaglia disse che «In’è una sposa desiderebbe ciò ch’omu trova sempre in’è e done di stradacce a marca di u desideriu sudisfattu.», ‘stu desiseriu sudisfattu un hè quellu d’avè vistu in’è l’ochji di parechj’omi u sprichju di a sò morte ? A tutte l’epuche, a parte animale di l’omu ha inspiratu tant’artista ‘n’è u sacru è ‘n’è u prufanu, ha produttu tant’opere cummuvente.

Pocu tempu fà, aghju vistu a mostra, simbulica animale, d’Oreste Zevola, artista napuletanu. A mostra dava à vede suttilmente e dimensione di e currispundenze tra animali è omi. Ma quandu ci vene u capugiru, face cume una magnifica balaustra chi serve d’appoghju spassighjendu intornu à l’abbissi tra simbuli e carne. ‘Stu bellu viaghju spirituale fece ricuccà in mè ‘sti versi di Baudelaire :

« A Natura hè un tempiu induve pilastri vivi
Cappianu à tratti cunfuse parolle.
Appena l’omu franca una machja di simbuli
da ochjate casane si sente guaitatu»

A mostra ghjè uspitata da a “Galerie Sponte” un locu ecceziunale ‘n’è a tradizione di e case d’artista di Montaparnasse, che u possu che raccumandà. Se un avete ancu vistu sta mostra, currite puru fine a 15 di ghjugnu…

G. Capirossi