Quantu simu alluntani di a tragedia greca ! Belli calati davanti à i nostri fuconi, vicini à a televisiò, i pedi accasati ind’un paghju di ‘Sciarentese’, eccu cume signunu di noi gode e piacè di a vita ! I tempi di guerra sò trapassati, oghje qualessu s’arricorda di l’occupazione taliana ò nazista ? Quelli chi hanu avutu à andà in Algeria, si tacenu cume se nunda si fusse passatu.

Allora a storia di Creonte tirannu spietatu castigatu da i dei pè ciò ch’ellu ha fattu à Antigona, parè tuttu u fattu di u corsu di a Ghjustizia. Eppuru, se nò ci ramintemu appena i raconti di i nostri antenati, pudemu tucca da u ditu i danni di a guerra. Creonte hè u capu di guerra di Teba, l’ha difesa contra l’attacca di l’armata di Polinice che hè statu feritu à morte da u fratellu Eteocle. U corpu di Polinice, u traditore, hè cundannatu à esse lasciatu senza sepultura à a voglia di l’animali : avultoghji, sciaccali. Un hè quasi a sorte che l’americani hanu fattu a Ben Laden ?

Antigona un pò lascià u fratellu cusì è oltrepassa l’ordini di Creonte chi a cundanna à esse immurata viva. A surella Ismena piglia e sò parte è a vole seguità in’è a sò sorte. Emone figliolu di Creonte è prumessu d’Antigona prova à fà cambia d’idea u babbu in vanu. U coru avvertisce Creonte chi a ribellione bolle. Tiresia l’induvinu cecu anch’ellu provà à falli capisce che u dannu hè prontu à adunda a cità. Prima Creonte erpia, ma dopu una stonda, piglia à u seriu l’avertimenti. Urdineghja di liberà Antigona. Ma hè troppu tardi, s’hè impiccata. Emone culpitu di tristezza si tomba anch’ellu, seguitatu subitu da Euridice a mamma. U dannu che Tiresia avia predettu hè accadutu, senza che Creonte ne pudessi qualcosa.

A storia d’Antigona simbuliseghja a capita di u dannu u più terribule pè l’omi, a guerra civile. A l’iniziu Polinice porta a guerra da fora. Creonte vince a battaglia è salva a cità. Ma u varmu di a guerra civile si mette a rode Teba. I partigiani di Polinice si ribellanu, e famiglie sò staccate tra quelli chi hanu u penseru di tene sicura a cità è quelli chi sustenenu à Polinice.  Eppò vene l'”hubris”, scimezza divina, chi piglia tutta a ghjente è causa ‘sta tumbera.

‘Sta tragedia di Sofocle, ci deve tene à mentu attraversu i seculi quantu a guerra civile hè un guaiu terribule. Più che un spettaculu, ‘stu teatru hè un messagiu cappiatu da i nostri antenati apposta pè noi.