Chi fecenu qui ‘sti ciocci alluntanati da i sò lochi ? Apparsenu davanti à u maestru altare di a Parochja San Luigi di pettu à un assemblea più abituata à i canti russi che francesi, è canti corsi un si ne parla micca. Dissenu chi cumpìanu un pelegrinaghju ind’un locu che tenenu caru pè incuntra un publicu fedele. Mi tenia prontu à pregà di tutta a mò fede chi temia un accessu intensu di picundria, quand’elli si sò messi à canta.
u prugrammu (cliccate pè ingrandà)
In fattu fubbe una spassighjata musicologica ind’u cantu sacru corsu, specialmente quellu chi tuccava à Sartè unu di l’alti di e scole cantorum di u mediterraniu. L’interpretazione fubbe sensibule, giusta, bella travagliata, è ci ha ramintatu chi a musica sacra corsa un si tense micca fora di e strade di a musica sacra europea è ch’era capace di tante bellezze pè lauda u Signore. Cambiava di i mughji d’alifanti che sentimu intantu intantu in chjesa di colpa à una tradizione paisana.
‘Stu concertu ci ramintò dinò chi Poletti ghjè di i puchissimi grandi di a Musica Corsa.
In tutti i casi, durante ‘stu spettaculu, prufessore Poletti ci ha imparatu assai . Prima, chi u cantu in pulifunia ghjè apparsu che dopu 1730, tandu un si cantava che a due voce : una bassa è a quintina. Avemu scupertu chi un di i maestri di core di Sartè insignò a musica sacra a Franz Listz chi cambiò cumpletamente di manera da pò ‘st’epica.
Ci ha datu una versione paisana di quache terzine di l’infernu di Dante. E ci ha cunttatu chi, cantendu cu u pastore chi li avia datu u cantu, avia pruvatu a voce di terza, cerchendu un contracantu, è u pastore, chi un era micca musicante, l’avia ripigliatu chi invece a terza duvia un contrapuntu.
A à fine, ci ha cuntatu a storia di a Canzone americana “In the pines” che à l’urigine sarebbe statu un versu di voceru nustrale partuttu in america cu corsi andati à difende quà là a libertà è chi, assai dopu, s’hè ritruvata in cima à i Charters musicali americani (di sottu a version di Nirvana). Grazie à Poletti è a i sò cumpagni pè ‘stu mumentu di musica dilicata, sensibula, di bella qualità, un gran piacè…