I visitadori chi un hanu micca vistu a Corsica à u Salone di l’agricultura quistannu, ch’elli si comprinu un paghju di spechjetti ! Micca unu, neancu duie, mancu tre, ma almenu sei o sette “stand” trà carchi di carnugli purcini, di casgi, biscotti, oliu, è tante è più, accungracciati, parianu un paisolu piantatu à mezu à u cumbugliu pariginu. Erisera, à parte di sett’ore, principiò a notte di l’agricultura. Una mez’ora dopu, ind’u quartiere corsu, detenu un segnale di a festa.

Se mai, uni pochi un avianu micca vista à Corsica, omancu avianu à sentela ! Parechji musicanti si messenu in ballu, c’era Regis Gomez, Petru Santu Guelfucci, è un altru di quale mi scappa u nome. Intunonu tutte e canzone e più famose di e Voce di a Gravona, di Canta u Populu Corsu, di i Chjami Aghalesi, di Petru Guelfucci, ed altre è tante. C’era un ambiente tremendu, una mansa di ghjente ricapizzati intornu à i musicanti sciaccamanavanu è cantavanu ad ogni ripigliu.

U mondu un cessava di ghjunghje. In piena serata, Petru, u babbu di Petru Santu, sortì u nasu. Subitu ci fu una tale uvazione ch’ellu un pudì rifusà di canta anch’ellu. Quandu ribombonu e prime parolle di u “Lamentu di Cursichella” mi fecenu corre un tremitu nantu à u spinu. A voce venia da duie metri da me. Se un pudessi sente u soffiu, mi tuccavanu e vibrazione. Ghjera una voce alta è chjara chi cullava è fallava nantu à u versu currente, à listessu tempu piena di forza è di chetà. Un mumentu cusi mi rese d’accunsentu di dì chi u Cantu ghjè l’Omu è chi u rispechjà. Mi parì allora cume d’esse empiutu da una cria d’anima sermanaccia.

O zitelli, quasi tre ore di musica è di canti ! Tenenu a funa i nostri cantarini ! i Baschi pruvonu d’avvicinassi cu una fanfara indiavulata. Ma si sfiatonu prima di disturba a festa. E cusi durò fine à ondeci ore di sera. Partìimu cu u sentimentu di una sera riesciuta.

PS. Durante sta serata, ebbi u piacè d’incuntrà à Petru-Ghjuvanni Luccioni. U sò libru “Tempi fà” hè veramente una somma nant’à u nostru usu è a nostra cultura. Mi cunfidò ch’ellu sara à u prossimu salone di u Libru di Parigi, u 15 è u 16 di Marzu, pè e dediche.