Moltifau hè un paese novu. Pare ch’ellu sianu i sepulinchi, chi pianu pianu avvicinendusi di e piane, hannu fattu i paisoli di Moltifau, Merozzini, U Borgu, e Pughjolle. E a tempi ch’ell’ hè ghjunta l’amministrazione, ha adunitu tuttu indè a cummuna di Moltifau. Eccu in qualche parolle i fatti.
Ma resta una mansa di questione : Quandu s’hè passatu ? Perchè a ghjente di u rughjone hè fallata pè e piane e un hè micca stata ‘nant’a i poghji suprani insulanati ? Sopratuttu che i Moltifinchi, fin a uni pochi d’anni, hannu sempre tenutu i so chjosi, e l’animali, intornu a Sepula e Cheta. Allora ch’hè accadutu ?
Documenti ci n’hè pochi, chi ‘sti paisoli un n’hannu interessatu a nimu, a parte a Chjesa chi a tempu di u mediuevu, tenia a saviezza e a tecnulugia. Savia trasfurma e richezze di a Natura in roba di cummerciu.
Se no riferimu a Antoniu Trojani d’Ascu, u rughjone a u mediuevu stava indè i lochi suprani d’induve si cummerciava da Niolu, passendu da Ascu, versu u Ghjussanincu e a Balagna. Pè e piane c’eranu i suldati, e taglie chi pigliavanu l’impositi, e tandu i banditi. Allora megliu a stassine luntani.
U paese d’Ascu, chi facia u cummerciu di a deda, era abbastanza riccu. A u favore di una perioda di pace, a populazione crescendu, quelli ch’un avianu micca travagliu in furesta, si so avvicinati da i lochi Moltifinchi pe fa cresce u granu. Cusì hè statu fattu u paisolu di sant’Agnulu.
I santagnulinchi avrebbenu prusperati, chi a pace (Genuvesa ?) ha cuntinuata, e si so stallati in Sepula, e pò in Cheta, a u piu vicinu di i so lochi di travagliu.
Mentre chi e strade diventavanu piu sicure, a Ghjesa mandò più luntanu preti e frate, pè assicurassi di a Corsica Cristiana. E cusi, a a bocca di a Ventulella, s’hè costruitu u cunventu San Francescu di Caccia chi chjuvò a strada da Balagna versu u Curtinese. U cummerciu passava menu da e sarre muntagnole e di più pe i stradoni piaghjali.
L’epuca di a pace Genuvesa purtò una mansa di giramondi, chi daretu a i preti, prufittendu di a pulitica culuniale genuvesa, si sò stallati dapertuttu, longu a e strade cummerciante. Moltifau, a l’incrocciu di a Balagna, di u Petralbincu, di u Curtinese, di l’Aschese, e di a strada vers’a Bastia era un locu lunsinghevule. Cusì cresciò a populazione di u Rughjone a a sò parasia.
Ch’hè accadutu durante a guerra contra i francesi. Chi partitu hannu pigliatu i Moltifinchi, quelli figlioli di giramondi, e quelli di sterpa aschesa ?
A a Rivoluzione i paisoli funu adduniti ne a cummuna di Moltifau. Dopu, a misura che i stradoni so diventati più sicuri, e strade di cummerciu hannu mossu più ghjò, versu u Ponte a a Leccia. U cunventu fu disfattu. Moltifau diventò, pocu a pocu un paese di campagnoli cu qualchi pastori, cercandu indè i cuntorni un stantapane chi mancava a u paese. Parechji hannu avutu da parte militari, pe stantassi una ritiratella.
Quale pode assicura che a storia s’hè passata cusì ? Pechè un si sarebbe micca passata cusì ? Nimu un la pode dì chi mancanu e prove. A ricerca di e prove, di i fatti chi podenu cunfermà o infermà sti fatti, hè l’oggettu di ‘stu capitulu.
