Sò andatu à stà da sente a cunferenza nanta a Pasquale Paoli, un omu di statura universale. Hè stalbata u 3 di marzu, a u spaziu di Reuilly in Parigi, a mezu i scontri 2007 urganizati da l’amichi di Cirnea. A salla era colma di ghjente simpatica, interessata, per quantu parechji cuniscendu assai bè u sugettu.
Nanta a catedra patrunavanu Antoine Marie GRAZIANI, Francine DEMICHEL, e Jeanne Marie SIMEONI a pacera, in casu che i dibattimenti giressinu a u cunfrontu. Vi possu subitu palisà che un hè micca statu u casu.
AM Graziani difese u puntu di vista che e baruffe un sò venute da a stumacata di Cardone contra l’impositi, ma da a voluntà di i nobili è di i nutabili da andà contra Genuva. Ste famiglie influente, abbastanze ricche per mandà i soi indè l’università taliane, un suppurtavanu più d’esse tenuti fora di e decizione chi tuccavanu à a Corsica, à e sò pruprietà è à quelle di i sò àffidati. A mezu stu gruppu decisu, che avia e sò intrate indè parechje corte in Europa, si sò rivelati omi eccezziunali cume Gaffori è Paoli.
Da savè se, st’omi eranu primurati di crià un statu mudernu, signunu deve fassi u sò pensà. Almenu hanu avutu l’estru puliticu di fà ghjucà i putenti allati di Genuva contra ella, ciò hè l’Austria é a Francia. Hanu sapiutu capisce u cuntestu puliticu internaziunale di u sò tempu, sò stati attenti a l’idee nove chi si sparsenu in Europa a l’epuca, hanu prufitatu di tutte l’uccasione chi pobbinu ghjucà per elli.
Figuratevi a Corsica 140 000 persone, cu 40 elettori. E cità sò piuttostu tenute da i genovesi o l’affidati. E campagne, i paesi muntagnoli, sò decisi da buttali fora. Frattempu i francesi cerconu da mette a manu nant’a a Corsica, ma a nostra pulitica un ha micca cambiata dapoi : i partiti, u francese è l’altri un s’accordònu micca. Ancu i preti sò di a partita pè sbarcà i genuvesi.
Eccu in qualche parolle, ciò ch’aghju tenutu a mente.
L’interessu di Francine Demichel era piuttostu per a custituzione è l’apparsa di u stabilimentu di u dirritu in Corsica. Allora che a ghjustizia paolina avia a rinòmina di ghjudica in furia, Paoli passava assai tempu a dumandà à i sò affidati di rispettà a nova legge. Benche l’omu avessi lettu Montesquieu è Tocqueville, benche a ragiò sorpassava allora l’ordine di diu, u capu di a Corsica duvia sempre cunciliassi cu l’usu lucale.
Se Francine Demichel ammirassi l’avenuta di u votu di e donne, questu qui, indè un cuntestu di votu censitariu, un toccarebbe che une poche.
In fine, a cunclusione di Jeanne Marie Simeoni messe tuttu u mondu d’accordu.
U terzu libru di a currispundenza di Pasquale Paoli raccolta è cummentata da Antomaria Graziani, ci dà l’occasione di entre più luntanu indè a cuniscenza di l’alma di quellu chi fu a listessu tempu l’omu di i lumi, un ginerale di a Corsica e u Babbu di a Patria.
