Quandu gira u circulu di a vita – a nàscita, a giuventù, a maturità, a vechjaia -, un c’hè da cercà più luntanu, ci porta sempre a l’altru mondu. M’arricordu di certi intarri di vechji o vechjetti secchi, a mezzu a i purfigliuni lacrimosi, si luttava pè tene i risi in fondu a a cannella, tantu ci rivenissinu a mente stalbatoghje.
Per esempiu questu qui, chi, quandu si mettia in zerga, pisava un bastunacciu fina a sopra u capu, per dà a vista di una cativezza massima, eh bè, figuratevi una volta, pigliatu di debulezza, l’hè falattu diritta nantu a a chjocca, u corciu hè cascatu seccu è s’hè tenutu una simana un curnochju di sottu a a baretta.
E quell’altru, un bravu vechj’omu chi passava u sò tempu in piazza a u paese pè fughje a moglie, più dragone che donna. St’omu salutava sempre e giuvanotte per ch’elle s’avvicinessinu una cria è ch’elle piantessinu per scambià duie parolle. Ed’ellu quand’ellu parlava cu giuvanotte, un si pudia ritene di bavacciulà. Eh bè pensate che una volta, avemu accoltu tutte e giovannotte di u cantone, é ci simu affacati in piazza a u paese. Pensate a a mansa di mandili incrusciati a a fin di u ghjornu.
In Corsica a morte face parte di a vita. Si parla spessu di i morti cume di i vivi, eccettu che per i morti si aghjunghje “ben di”. L’altru mondu hè vicinu, certe volte ci pare ancu intornu a noi.
Eppuru c’hè una cosa terribula chi tene tutte e cannelle strinte a u puntu chi ci caccia a parolla, ghj’hè quandu si spinghje una prumessa di vita, voghju dì un ciucciu o un zitellu. Ancu se omu si tace per un palisà u nome di si so cari, a malatia è a sciagura fanu prestu per arrubassine e preziose criature.
Sta simana, sò andatu, core stappatu, ad accumpagnà un zitellu, un cuginellu, nantu a l’ultimu stradone. Quandu ghj’hè u mal distinu, a sfurtuna, si pode vulta a sò zerga ancu contra Diu. Ma, quandu ghj’hè u disperu chi ci caccia i cari, tocca a noi di piglià a quistione.
In sti tempi d’elezzioni, tenimu a mente sta quistione. Pensamu una cria a a sucietà che nò vulemu, una che ci dà a speranza di una vita più felice, o una che ci porta addisperu.
