Avete intesu tutti sta cacciata : Ségolène Royal à RTL. Sarebbe una macagna ! “Una ne pensa u ghjattu (Gérard Dahan) é l’altra u topu (Segolène Royal)”. Avemu da  lascia corre, chi c’hè u ghjattu in ballu ? U peghju ghj’hè che u topu sprime u penseru di una bella parte di u cuntinentu, é micca a piu simpatica.

Nantu u puntu di a Corsica, Ségolène Royal è Nicolas Sarkozy ghj’hè cume casgiu è furmagliu. Speremu chi “l’ordre juste” di a prima un ci cunduci micca a a staccata di Corsica, è chi e prumesse di u secondu (u PEI) voganu più luntanu che e misure chi sò digià in ballu (u PEI).

Ohimella, a Corsica pesa pocu indè a bilancia pulitica di pettu a rughjoni pupulati è numerosi. Eppuru, hè tempu di entre indè u dibattu chi dopu un avaremu che a rode ceci.

Cose da migliurà, ci n’hè parachje, sopratuttu a propositu di i trasporti. Saccu viotu un tene rittu. Soga chi trasporti piu sicuri è menu cari favuriseghjanu a cresciuta di l’imprese è podenu rinfurza l’attività oghjinca : turismu, agrualimentariu.

Avemu bisogna che l’imprese si svillupinu in più di u turismu pè alluntanà a sorte chi ci aspetta senza dubbitu : diventa una spezia di novu Monacu.

Ramintemusi chi a i tempi di i nostri babbi a Corsica fu a prima parte di Francia metropulitana a liberassine in 43. Allora, se i cuntinentali fussinu fieri di a Corsica, quantu cose cambiarebbenu.

Eccu, u mio sognu, eccu a prumessa ch’ò aspetta da i candidati : Chi a Corsica si mettissi in marchjia e, chi a a piazza di a vergogna, nascissi a fierezza.