So di i paesi di Ersa, di Moltifau è di Ascu. Da una parte, fattu di l’asprezza sventulata di Capicorsu, ma chi face vini squisiti, da l’altra, sculpitu da e forze telluriche di e Muntagne corse.

Mi n’arricordu tempi fà, i paisani si accuglìanu in piazza, à u frescu , à chi pusatu, à chi incagarunatu, à l’ombra di un vechju chalzu ò di un platanu. Tandu si, chi si sentianu e stalbatoghje, e macagne, è e litiche pulitiche. A tratti, nascìanu i risi, i gridi, i singhjozzi, i lagni, ancu i colpi arrabbiati di bastoni nantu à e cudiccie di i muraglioni. Signi unu avià u sò pare nantu à e cose di a vita è di i paesi. Signi unu si cridia sempre u più malignu. Ma un si ne truvava dui d’accordu.

L’animu di a lingua corsa rispechja st’ambiente, a listessu tempu cumpiacente, ironicu, certe volte invidiosu, ma sempre rispettosu di a vita è di a sorte. A dilla franca, per mè, pè una bella parte a lingua s’hè fatta cusì. Oghje chi i banchi è e murette sò spachje, facciu stu blog pè pruvà da ritruvà l’ambiente è a lingua di sti lochi, e pè sparte cu inamurati di quessa fughjiticcia, qualche crunachelle.

E se uni pochi di quessi venissinu intantu intantu à dì a soia, allora focu à a ceppa.